ਜੁਲਾਈ ਵਿੱਚ ਮਹਿੰਗਾਈ ਘੱਟੀ, ਪਰ ਗ੍ਰੋਸਰੀ ਤੇ ਰਿਹਾਇਸ਼ ਦੇ ਖ਼ਰਚਿਆਂ 'ਚ ਵਾਧਾ

ਜੁਲਾਈ ਵਿੱਚ ਮਹਿੰਗਾਈ ਘੱਟੀ, ਜਿਸਦਾ ਵੱਡਾ ਕਾਰਨ ਪੈਟਰੋਲ ਪੰਪਾਂ ‘ਤੇ ਮਿਲੀ ਰਾਹਤ ਰਿਹਾ, ਪਰ ਸਟੈਟਿਸਟਿਕਸ ਕੈਨੇਡਾ ਨੇ ਕਿਹਾ ਕਿ ਗ੍ਰੋਸਰੀ ਤੇ ਰਿਹਾਇਸ਼ ਦੇ ਖਰਚੇ ਪਿਛਲੇ ਮਹੀਨੇ ਵਧੇ ਹਨ।

ਏਜੰਸੀ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਜੁਲਾਈ ਵਿੱਚ ਸਲਾਨਾ ਮਹਿੰਗਾਈ ਦਰ ਘੱਟ ਕੇ 1.7 ਫੀਸਦੀ ਹੋ ਗਈ, ਜੋ ਜੂਨ ਵਿੱਚ 1.9 ਫੀਸਦੀ ਸੀ, ਤੇ ਅਰਥਸ਼ਾਸਤ੍ਰੀਆਂ ਦੀਆਂ ਉਮੀਦਾਂ ਨਾਲੋਂ ਥੋੜ੍ਹੀ ਘੱਟ ਸੀ।

ਉਦਾਹਰਣ ਦੇ ਤੌਰ 'ਤੇ, ਕਿਰਾਣਾ ਸਟੋਰਾਂ ‘ਤੇ ਖਰਚੇ ਸਲਾਨਾ ਆਧਾਰ ‘ਤੇ 3.4 ਫੀਸਦੀ ਵਧੇ, ਜੋ ਜੂਨ ਵਿੱਚ 2.8 ਫੀਸਦੀ ਸਨ। ਚਾਕਲੇਟ ਤੇ ਕੌਫੀ ਉਤਪਾਦਾਂ ਦੀਆਂ ਕੀਮਤਾਂ ਜੁਲਾਈ ਵਿੱਚ ਕਾਫੀ ਵਧੀਆਂ, ਜਿਸ ਬਾਰੇ ਸਟੈਟਕੈਨ ਨੇ ਕਿਹਾ ਕਿ ਇਹ ਉਹਨਾਂ ਦੇਸ਼ਾਂ ਵਿੱਚ ਮੁਸ਼ਕਲ ਮੌਸਮੀ ਹਾਲਾਤਾਂ ਨਾਲ ਜੁੜੀਆਂ ਹਨ ਜਿੱਥੇ ਕੋਕੋਆ ਅਤੇ ਕੌਫੀ ਬੀਨ ਪੈਦਾ ਹੁੰਦੇ ਹਨ।

ਮਿਸਾਲ ਵਜੋਂ, ਤਾਜ਼ੇ ਅੰਗੂਰਾਂ ਦੀਆਂ ਕੀਮਤਾਂ ਲਗਭਗ 30 ਫੀਸਦੀ ਵਧੀਆਂ, ਜਿਸ ਨਾਲ ਤਾਜ਼ੇ ਫਲਾਂ ਦੀ ਕੁੱਲ ਕੀਮਤ ਜੂਨ ਦੇ 2.1 ਫੀਸਦੀ ਤੋਂ ਵੱਧ ਕੇ ਜੁਲਾਈ ਵਿੱਚ 3.9 ਫੀਸਦੀ ਹੋ ਗਈ।

ਏਜੰਸੀ ਕਹਿੰਦੀ ਹੈ ਕਿ ਗੈਸੋਲੀਨ ਦੀਆਂ ਕੀਮਤਾਂ ਸਾਲ-ਦਰ-ਸਾਲ 16.1 ਫੀਸਦੀ ਘਟੀਆਂ, ਮੁੱਖ ਤੌਰ ‘ਤੇ ਕਾਰਬਨ ਟੈਕਸ ਹਟਾਉਣ ਕਰਕੇ। ਤੇਲ ਨਿਰਯਾਤ ਕਰਨ ਵਾਲੇ ਦੇਸ਼ਾਂ ਵੱਲੋਂ ਉਤਪਾਦਨ ਵਧਾਉਣ ਅਤੇ ਇਸਰਾਇਲ-ਈਰਾਨ ਟਕਰਾਅ ਵਿੱਚ ਵਿਰਾਮ ਤੋਂ ਬਾਅਦ, ਪੈਟਰੋਲ ਦੀਆਂ ਕੀਮਤਾਂ ਮਹੀਨਾਵਾਰ ਆਧਾਰ ‘ਤੇ ਵੀ 0.7 ਫੀਸਦੀ ਘਟੀਆਂ।

ਰਿਹਾਇਸ਼ ਸੰਬੰਧੀ ਮਹਿੰਗਾਈ ਜੂਨ ਦੇ 2.9 ਫੀਸਦੀ ਤੋਂ ਵਧ ਕੇ ਪਿਛਲੇ ਮਹੀਨੇ ਤਿੰਨ ਫੀਸਦੀ ਹੋ ਗਈ, ਜੋ ਫਰਵਰੀ 2024 ਤੋਂ ਬਾਅਦ ਇਸ ਸ਼੍ਰੇਣੀ ਵਿੱਚ ਪਹਿਲਾ ਵਾਧਾ ਹੈ।

ਕੁਦਰਤੀ ਗੈਸ ਦੀਆਂ ਕੀਮਤਾਂ ਜੂਨ ਨਾਲੋਂ ਘੱਟ ਦਰ ‘ਤੇ ਘਟੀਆਂ, ਜਿਸਦਾ ਮੁੱਖ ਕਾਰਨ ਓਨਟਾਰੀਓ ਵਿੱਚ ਵਧੇਰੇ ਖਰਚੇ ਹਨ।

ਬੈਂਕ ਆਫ ਕੈਨੇਡਾ 17 ਸਤੰਬਰ ਨੂੰ ਹੋਣ ਵਾਲੇ ਆਪਣੇ ਅਗਲੇ ਵਿਆਜ ਦਰ ਫੈਸਲੇ ਲਈ ਇਹ ਮਹਿੰਗਾਈ ਦੇ ਅੰਕੜੇ ਧਿਆਨ ਨਾਲ ਵੇਖੇਗਾ।